Með lögum skal land byggja en með ólögum eyða

Nú er svo komið fyrir klámlögunum að Sigurður V. Steinþórsson telur ekki ástæða til að fylgja þeim og lýsir því yfir í Fréttablaðinu í dag að hann ætli að framleiða og birta íslenskt klám og borga leikurunum allt að 150.000 krónur fyrir, takkfyrirtakk. Til upprifjunar birti ég hér brot úr 210 gr. almennra hegningarlaga: "ef klám birtist á prenti, skal sá, sem ábyrgð ber á birtingu þess eftir prentlögum, sæta sektum eða fangelsi allt að 6 mánuðum. Sömu refsingu varðar það að búa til eða flytja inn í útbreiðsluskyni, selja, útbýta eða dreifa á annan hátt út klámritum, klámmyndum eða öðrum slíkum hlutum, eða hafa þá opinberlega til sýnis..."

Þessi maður, þessi blessaði, ræfils pizzasendill hjá Domino's (ekki það að það sé eitthvað að því að starfa sem pizzasendill, mér finnst bara fyndið að það skyldi hafa verið tekið fram í Fréttablaðinu), ætlar "..bara að láta reyna á þetta". Ástæðan fyrir því að hann telur ekki eftir sér að lýsa því yfir í fjölmiðlum að hann ætli sér að brjóta lögin í landinu er meðal annars sú að aðrir fá að brjóta lögin, óhindraðir, og nefnir hann þar framleiðendur og dreifendur tímaritsins Bleikt&Blátt.

En af eilífum, stöðugum og viðvarandi ótta við að vera kölluð rauðsokkulesbía og kynkaldur trukkur í kommentakerfinu ætla ég að segja að... nei djók. Ég er stolt rauðsokkulesbía og trukkur, þó ekki sé ég kynköld. Ekki leika í klámmyndum krakkar mínir 150.000 kall er ekki neinn peningur og ég er viss um að leikur í klámmynd er ekki minning sem maður yljar sér við á tímum erfiðleika eða á efri árum.

Make love, not porn.