Það er til borg sem heitir Spilaborg

Ég er norðan heiða í faðmi fjölskyldu minnar. Þetta er hluti af henni; gamla fólkið og litlu börnin. Þetta vaknar fyrir allar aldir. Sem betur fer eru þau lunkin við að hella upp á rótsterkan sopa, annars væri ég varla vakandi.

Amman getur búið til spilaborg úr heilum spilabunka. Afinn vill horfa Eddy Murphy í sjónvarpinu áður en hann fer í búðina eftir mjólk. Amma sagði að það væri allt í lagi en aðrir mótmæltu, einkum vegna þess að klukkan er 11 fyrir hádegi. Fimm ára barnið raular með sálmunum í útvarpinu og yngsta barnið talar tungumál sem enginn skilur. Faðir barnanna liggur í rúminu, ofurlítið slasaður á auganu. 

Hvað þýðir miskunn?
Miskunn? Miskunn er náð. Veistu hvað náð er?
Hvað?
Ég veit það ekki alveg sjálf.

Svona gengur þetta.

 

Athugasemdir

[Júdas, 1.7.2008 kl. 08:20]

Njóttu lífsins í faðmi fjölskyldunnar.

[Soffía (IP-tala skráð) 2.7.2008 kl. 21:24]

Rosalega eru þetta myndarleg börn;)

[Bjarki (IP-tala skráð) 3.7.2008 kl. 20:03]

Fjölskyldur eru ágætar. Um það er ekki deilt svosem.

Takk fyrir sambúðina svo. Þetta var fínt.

[Dísa (IP-tala skráð) 7.7.2008 kl. 23:05]

Ég verð bara að vera sammála mömmunni hér að ofan. Þessi börn eru algjörar rúsinur. Gamla settið er líka frábært í alla staði.