Margt má mig mæða..

Ég þarf eiginlega að gefa skýringar á breyttu háttalagi mínu í netheimunum. Ég er farin að gefa mig mun meira að pólitískri umræðu og því sem er að gerast í fjölmiðlum. Þeir sem unnu gamla blogginu geta lesið það aftur ef þeir vilja (og ég mæli með því, það er mjög fyndið, slóðin er www.vilborgo.blogspot.com). En engar áhyggjur samt. Heimsmálin eru hilleeeeeríös fyrirbæri.

Ég ætla annars ekki að blogga um neitt um fjölmiðlamál núna. Það er persónulegt mál sem brennur á mér. Þannig er mál með vexti að bekkjarbræður mínir tveir, Heiðar og Kalli, smíðuðu borðtennisborð til að hafa í skólanum. Það hefur verið mikið í notkun síðan. Ennþá er það þannig að ég er eina stelpan sem er að spila eitthvað á því að ráði, þó ég eigi von á því að það breytist hvað á hverju. Það sem brennur svona á mér núna er að allir strákarnir eru búnir að fá einhver bráðskemmtileg viðurnefni í bortennisbransanum en ekki ég. Viðurnefnin eru öll þess eðlis að þau segja eitthvað til um hvernig þeir spila og hafa verið að standa sig hingað til. Þannig er Kalli kallaður Geitungurinn, vegna þess að maður veit aldrei hvenær hann stingur, Heiðar er kallaður Lurkurinn vegna þess hversu fast hann smassar (og lurkslega), Árni hlaut viðurnefnið Móðir Teresa; fyrir að vera vænsti drengur og blíðlyndur, gefa fólki eftir stig og annað slíkt, Elli er Tannlæknirinn vegna þess að allir þurfa að mæta honum einhverntímann en flestir kvíða fyrir því (hann er svo helvíti góður drengurinn), Snæbjörn er Snákurinn af því að... hann er bara snákurinn, Friðgeir er Fred Astaire af því að hann dansar svo fallega við borðið. Allt mjög fallegt. En þegar kemur að mér hefur viðurnefnið "konan" borið hvað hæst. Ég vil bara benda á að "konan" er ekki vísun í leikstíl heldur bara aðgreining. Ég er ekki kall, eins og þeir, og þessvegna kona. Ég vil töff viðurnefni sem segir til um hvernig ég spila borðtennis, ekki nafn sem setur mig á annan stall en alla aðra sem nota borðið. Ekkert að því að vera kona samt. Það er alveg jafn fínt og að vera manneskja bara. ..Ætli ég sé ekki kölluð "trukkurinn" á laun? Það er heldur ekki nógu gott.

Annað mál á dagskrá:
Eftir að hafa verið í matarboðum í vikunni með bæði stórvini mínum; Hannesi Árdal, og kærasta systur minnar; Viðari úr gettóinu Garðabæ, sem báðir eru frábærir karakterar, en sjálfstæðismenn, hefur skoðun mín á sjálfstæðismönnum mildast. Þeir eru ekki upp til hópa stórhættulegir glæpamenn sem hvetja til stríðsreksturs á hendur öðrum þjóðum, heldur meinleysisgrey. Það breytir samt engu um hvort fólk ætti að kjósa þá. Maður setur ekki grey við stýrið á skipi ef maður vill komast í örugga höfn, maður setur gallharðan jafnaðarjaxl!

Jæja, ég ætla að reyna við 80 í bekkpressu og fara svo í rúmið.

Athugasemdir

[Jó (IP-tala skráð) 24.2.2007 kl. 13:56]

Hvað segir þú um ljónið ... sé fyrir mér að borðtennisstíll þinn sé mjög villtur.

[Ása (IP-tala skráð) 25.2.2007 kl. 22:48]

Iss ! Ég tek þig nú í sjómann.

[Vilborg Ólafsdóttir, 26.2.2007 kl. 11:27]

Já þú ert líka þrír metrar á hæð og 113 kíló Ása. Ég ræð ekkert við þig!  (tékkið bara á blogginu hennar, hún er hjúds! ;) www.blog.central.is/asaola
Annars er ég komin með viðurnefni! Það mun vera Pólstjarnan (því ég er upprennandi stjarna úr norðurátt). Júhú. Og það er eiginlega búið að breyta viðurnefninu hans Snæbjörns í Freud því hann á það til að sálgreina andstæðinginn áður en hann spilar við hann og lauma svo inn óþægilegum athugasemdum í miðjum leik sem taka menn á taugum.

[Gústi (IP-tala skráð) 26.2.2007 kl. 13:15]

Ertu viss um að þetta eigi ekki bara að vera Conan, eins og Conan the Barbarian með Schwatzenegger (einnig Conan the Destroyer, Conan the Librarian og nú nýlega Conan the Republican), vegna þess hve yfirgengilega og miskunnarlaust þú rústar andstæðingum? Mér finnst Conan helsvalt viðurnefni.